除夕

坐低無幾耐,明明防波堤有成公里咁長,偏偏會有一家大細踩單車係旁邊停低大大聲傾計,再將單車擺係另一面夾住我,有幾咁唔識做人,先會咁⋯

換個位置,隔無耐又有三個釣魚客來到,只隔兩三個身位身邊揮杆⋯ 釣魚條線就係我眼前浮浮沉沉,欲哭的寧靜當然冇埋。

都係孭番好個袋,繼續行漫漫長路。

#kin122

結尾

沒有像往年般滿是意念的寫年結篇章,甚至想不到該怎樣開始。概括這一年,是太多,也太難,也不知該怎樣說起。

經歷人生第一次的空窗期;轉換了一份工;看了很少的書,沒有預期的寫少了很多文;似乎已經無以為繼的關係;但對比香港發生的,卻未免顯得太太太太渺少,但當中有的哀傷是真實的,這一年所經歷的學到的也是珍貴的。

嗯,咁少字,但寫不下去了。或許再靜靜會好些。或許醒來會好些。或許明年會好些。

記一下:今天頂唔住開咗b119用,解救下。

#kin122

This entry was posted in 啐念.

迪迪尼

去了一趟迪迪尼。

以前都嚟過好幾次。但如果講開心,今次係最開心的了。因為真係明顯感受到心放開咗嘅歡樂,真係做到叉咗電,雖然,行到腳同腰都好攰。人到呢個年紀,有啲事真的不得不放開。求不得,就選擇放手。同朋友嚟都好開心吖,都唔一定要拍拖。

都唔知自己想寫咩。其實新工同諸事都甚忙,好疏懶。同時間,可以因為同某人越嚟越少見面,大概都可以為佢日後離開鋪鋪路。反正,都已經變成只係戲友飯友⋯

寫咁大堆嘢,都係想post吓張相。同提醒下自己,前面仲有好長嘅路。日後睇番呢篇blog呢張相,都應該回憶番啲開心嘅嘢。

緘默

(我啲時間就花係佢個籮柚度)

好耐冇更新呢度了。主要係因為早陣子狀態有點波動 / 返新工在能量、身體、節奏都調適中 / 冇時間咁,所以想寫都的唔起心肝咁。

簡短記一記今日的收到的。話說今日受朋友所託幫佢安排一個healing session,地點在她家。朋友早前其實問有冇咩班岩佢讀,但隔住WhatsApp 都覺能量有點塞,於是遠傳咁解決咗佢身體上的狀況先。咁今日做完session,佢避席嘅老公返到,我都認識的,坐係窗台食住煙咁聽我地對話。

當中能量開始有啲停滯,我望望阿老公氣牆有點灰,順口問了句工作如何⋯ 然後,高我就撳停咗我,要我緘默,然後,就無再接續下去。

記呢件事,碰巧在綠格 kin39呢日,我想,大概係我嚟緊要好好記得,有些事縱然我知道,但要尊重個體,係唔係正在適當時候同空間去接收訊息。如果對方不,又或者隨自己意涉入,都不過是小我的一部分,影響對方嘅節奏。

另一件類似嘅事發生係剪髮中。不過就無太牽涉咁靈性嘅部分。但適當時保持緘默,都係讓事件流動嘅方式。

大致係咁,估唔到綠格都有有趣事。以上~

Little Fresh

人生第一份工嘅同事約食飯,約咗兩年,因為反修例因為疫情一拖再拖。這日同事突然係group臨時約,另外一個同事又有空,即興選了可以book枱的Little Fresh食飯。

久聞Little Fresh「好好食」,果然沒有失望。不過提出飯聚嘅同事同佢老公(都係舊同事)因為疫情冇工開好耐,加埋我,除了一個有穩定工作嘅同事,見份量不大,係有少少肉赤。不過偶爾一次唔緊要啦。

兩年前想約食飯都係想圍爐同路人傾計,畢竟大部分舊同事竟然係藍人。豈料今次除咗圍爐,仲講移民。舊同事兩公婆係英國連樓都買了,只待多半年就離開。有小朋友的家庭,係香港前途上,的確需要更多的考慮。

約定下次要再出來farewell,英國食西餐,咁下次出嚟就一定要幫襯中餐了。

樹洞文

記得旺角好似有三間越興園的,但黃app只顯示一間。其實我甚少到女人街開餐,怕舊餐廳的味道。女人街的越興園雖然舊,但沒有令我縮沙的味道,不過坐樓上一對烏繩打孖咁(交配?)飛來飛去,如果少啲烏蠅就更好了。

某人的工作時間不定,有時佢想臨時約都約不成。好耐冇見面,今次佢特登一早約定,雖然端午節還是照出去。約在旺角想吃些平日在鞍山吃不到的,去了好久無去的越興園。

好好味,價錢相宜,最合我呢啲待業人仕。不過某人依舊爭住付帳。有時有啲唔好意思的,沒有主動約也是因為呢個原因。

飯後隨便的行,他像組織好久般問我見工的狀況。上星期的失態我在和他通訊中潛了水,因為說不出也不想面對。結果這夜他再問,所以我還是說了一次,說到哭,無奈的在街中流淚。於是他結結巴巴解釋,這時候才感覺到關於我的事其實他也有在在意,在我潛水完後訊息也變多,是大家一直都夾不到時間而已。就這樣在路中心說了好久,一向呆呆的他還竟然逗我笑,也說了些在放心中不敢告知的事,算是放下心中的一塊石。

***

說說今天。

昨夜睡前想起星期六老師的話,那「委屈」,終於能面對當中包含了甚麼。於是在睡夢中見到了哥哥,竟然衝著哥哥把一腔悲傷化為怒罵,一邊罵一邊哭,直至哭醒。早兩日野豬把完脈就建議我要搵個地方「喊鑊勁」,沒想到係夢中發生呢件事。外出後望著藍天不禁想,其實我不想要感到委屈,卻無奈現在正因為過往的委屈事下令到境況難捱(見工事件),家庭的事,以前感情的事,好像都沒一項沒經歷過這感受。就算想努力克服,但眼前發生種種事總叫我感到無力。明知道失去力量才是導致一事無成的主因,但這刻都還在這困頓中。

另一邊廂其實也有事兒在起動。上升處女的質素讓我想事情跟著我所希望的發展,但實情是遲遲未發生。我知道宇宙幫了我很多,但我還是想事情能如願來填平那份不安感。

那天見野豬,佢問起其中一樣我未想通的事。我說我未ready。

「如果嗰個人係你面前就死,你會唔會話未ready就唔去救佢?」

我諗唔轉其他醫生的其中一個原因,就係呢個人總用最合適嘅方法去篤醒我。而事實係,我呢期真係受唔起任何形式的引爆。說完後然後佢又例趕客,「好啦,返去休息下啦」。

寫完,係時候瞓。

This entry was posted in 啐念.

Bad day, good day

飲過食過瞓醒咗,記一記噚日發生的事。

簡單嚟講就係見工失敗。而過程係,係匆忙嘅見工時間,對住一個好要一針見血嘅高層,到要用英文自我介紹嘅時候,我竟然一句完整嘅句子都講唔出⋯

當刻,喉嚨像被鍊住了,胸口忽然一道氣塞,而腦袋竟然一片空白。高層其實都好善良,畀時間我調整「Take it easy」,但咳完氣都還在頂住,說不出就說不出,難得的一個interview,就毁在一刻的語塞上。就算之後裝作平常完成,但呢世人第一次發生咁嘅事,唔沮喪就假。

完結後繼續行程,幫皇上配藥,同皇上去診所覆診,回家靜落嚟後又迫自己午睡,睡醒諗番成件事⋯ 以當時情況用「畀👻鍊住喉嚨」真係冇誇張,以靈性角度睇,可能係反映呢間公司唔適合我⋯

當然知同接受係兩回事,兩個朋友得知事件,即時約出去晚飯「輕鬆番」,對件事都無再有太多討論,但呢兩個we wang wang 朋友都提示:人生有啲嘢做唔到就係做唔到,我對自己太harsh真係需要休息吓。

於是係朋友推介嘅呢間餐廳,三個女人講啲輕鬆嘢,飲飲食食過一晚(不過我冇飲酒)。

呢日雖然過得好差,但有朋友嘅支持(唔淨止呢兩個),可能過後一日,回想會覺得其實係good day。

(相係出門等巴士時影)

樹洞文

空窗期踏入第三個月,皇上的病和搵工零回應,在月蝕的期間,搞到幾乎(內在)崩潰。但明明感覺到有些起動,但又不動,變成了耐性大考驗⋯ 而同時間,皇上對於遲遲未脫離生蛇後遺症極不耐煩,數度發爛又每日唉聲歎氣⋯ 怎麼好似互相project,一邊叫皇上有啲耐性等康復,一邊又暗地著急未搵到工的自己,兩個人好似互loop一樣。

呢個情形,某程度上都係自自地閉的原因。連對「形而上」有啲意見嘅野豬,都開口話我「成團旋渦咁」。見我用藥都唔算有大起息,早就講因為鬱結影響(把個脈都知心情差,乜料),不過佢見皇上咁嘅樣,係皇上房外等拎藥嘅期間,開口講好耐冇講嘅佛偈:「佢咁樣其實都係因果嚟,你盡晒力都幫唔到佢架啦⋯」結果我一行出去坐低等執藥時就忍唔住喊,當然付出不一定有對等收穫,但總總加埋,自己學咗咁多都好似幫唔到皇上同自己(其實係有,但未到希望嘅效果),灰心同難過,加埋好多野,難免炒埋一碟。

同時間,不善言辭、實際上都算唔太care的某人,冷氣軍師咁send個msg講做咩做咩(反正都好少見),於是又忍唔住爆番個msg過去:其實我只係想聽到安慰說話。當然最終冇收到我需要嘅安慰同回應,不過確實,都終於不能不承認,我都真係想被關心被安慰被照顧。

臨走前野豬話得兩條路揀,一係就好堅強咁捱過,一係就死頂住捱過,我問可唔可以咩都唔做,我想逃避。事實係當然唔得,而其實要感恩係如果唔係空窗期,都冇可能照顧到皇上。但如果要照顧皇上而繼續搵唔到工(念的力量),我諗身同心都捱唔到幾耐。

有時唔係唔想見人,不過見到朋友時就算唔提唔講都唔小心放咗負,又唔想。呢啲狀況,竟然有angel msg 叫我可以轉向發展,呢個亦係令我崩崩地潰嘅其中一個原因。

都唔知點講畀人聽,寫係度當抒發吓,瞓醒又要繼續「正常」過。

This entry was posted in 啐念.