• 2014年尾AK昆明機票特價,問班朋友有無興趣去雲南玩。但大家都興趣缺缺咁。年頭貝貝姐百日宴後,Felix 突然問喂係咪想去雲南,有個交流團去雲南做義工啱你喎(幾咁警訊feel)。結果咁,就由3月義工簡介會,到義工營,到青少年訓練營9丁人組長,到每星期小組會睇住文化展覽進度,交流晚會,組長義工開會,到7月尾開波差不多近百人一個鐘飛機十個鐘車去雲南保山大庄中學,幾日幾夜得十幾度唔夠衫無涼沖但陪住班14-17香港青少年呢幾個月忙碌但成長學會感恩學會尊重學會付出愛同關懷,都不枉幾個月忙碌千里迢迢去雲南但無觀光😆 除此以外,都無諗過會被Ruby 媽揀出來做組長,謝謝她及一眾組長們互相補位幫助信任,其實我覺得自己幫到青少年幾多,反而係大家義工青少年身上學到好多就真。
• 其實未出發雲南,一晚Janice Jbb 開完義工會打來,「好!預我吖」咁都無問詳細一個信字就跟咗Jbb 做咗領袖活現committee。領袖活現是交流團延續活動,比個平台青少年在交流團學到的回饋番比香港社區。所以交流團後就直踩領袖活現開會報名各樣工作快速地安排青少年日營開波。由開始青少年都唔知發生咩事咁出去做服務,到第二周末打晒風又橫雨咁協助深水埗明哥派飯,再正式啓動籌備12月25日沙田大會堂大型的籌款嘉年華,一班組長又有愛又激心的帶領,還有青少年敢想敢做,25號終於好完滿地完成嘉年華,再26/27日大棠營結束整個三個月的活動,又再印証青少年嘅潛能同無限可能。其實組長們辛苦更多,不過我想大家見到青少年成長,都一定覺得好欣慰好值得~
• 因為推友士摩妮鼓勵開始响MPS 跳lap,識到朋友仔Celia,再响兩位鼓勵下,一把年紀走去學人跳pole dance。其實筋已硬骨已脆真的不容易,不過成世人未做過一樣活動是要身心豁出去的,於是就開始挑戰自己。亦因為pole認識一班靚女一齊練習一齊互毒睇衫睇鞋一齊笑笑玩玩咁,流晒汗都唔會嫌棄對方的朋友真好,仲有大家都是傻的。來緊要一齊努力練倒轉自己啦大家,加油呀喂!哈哈哈。
• 最後一件覺得必須要提的事。長達5個月的面試完成。平安夜信已遞。3年多後,終於為自己爭取到新開始啦。
• 再最後一件。舊的Pebble,已好好放下並安在回憶處了。謝謝Pebble Time~
想說的大概如此了。再私人的就留番比自己了(都無咩大事啦其實)。在此鳴謝這年遇到結伴的同伴們大朋友們青少年們小朋友們靚女們不勝枚舉不一一道謝同tag了。有緣見到此文就收到啦。
預祝新年快樂!2016 要快樂幸福豐盛喔!