飲過食過瞓醒咗，記一記噚日發生的事。

簡單嚟講就係見工失敗。而過程係，係匆忙嘅見工時間，對住一個好要一針見血嘅高層，到要用英文自我介紹嘅時候，我竟然一句完整嘅句子都講唔出⋯

當刻，喉嚨像被鍊住了，胸口忽然一道氣塞，而腦袋竟然一片空白。高層其實都好善良，畀時間我調整「Take it easy」，但咳完氣都還在頂住，說不出就說不出，難得的一個interview，就毁在一刻的語塞上。就算之後裝作平常完成，但呢世人第一次發生咁嘅事，唔沮喪就假。

完結後繼續行程，幫皇上配藥，同皇上去診所覆診，回家靜落嚟後又迫自己午睡，睡醒諗番成件事⋯ 以當時情況用「畀👻鍊住喉嚨」真係冇誇張，以靈性角度睇，可能係反映呢間公司唔適合我⋯

當然知同接受係兩回事，兩個朋友得知事件，即時約出去晚飯「輕鬆番」，對件事都無再有太多討論，但呢兩個we wang wang 朋友都提示：人生有啲嘢做唔到就係做唔到，我對自己太harsh真係需要休息吓。

於是係朋友推介嘅呢間餐廳，三個女人講啲輕鬆嘢，飲飲食食過一晚（不過我冇飲酒）。

呢日雖然過得好差，但有朋友嘅支持（唔淨止呢兩個），可能過後一日，回想會覺得其實係good day。

（相係出門等巴士時影）

之前都冇為意，野豬隻豬由一舊石變咗兩舊石。

所有事都是應該發生的。宇宙安排下，今個星期覺得停滯一段時間的能量動了，晚上看到節目講SRT，就順著calling msg 了兩年前幫忙的practitioner 約個session。

第一次見在朋友的家，匆忙而跳脫的會面，那時候碰巧準備轉到下一份工。今次是第二次見面，也是工作的轉折期。

兩個小時很密集而被宇宙安排極好的對談。有朋友說過跟SRT 不太connect，其實也沒有很dramatic 的事發生。但每一個msg 都完美地fit in 這段時間的狀況，連practitioner 都說沒有遇過這樣大connect 同msg，當真有點出乎意料之外。而宇宙總是有這樣有趣的未知。

當然咁大鑊的課題（100個零的past life loop，乜事）也不是一時三刻能拆解，但總叫有點眉目。而且宇宙早已安排下次會面一樣：這位只見過兩次的有心人，說此刻不用能量交換，等到找到工作先收錢好了。記得上一次，同樣在轉職新工的傍徨時間，有一個素未謀面但聯絡過幾次的「朋友的朋友」，免費為新工起了支卦，著我不用擔心。

空窗期是有點迷惘和傍徨，但宇宙給的力原來好大。咁斷了的天線也該是時候駁回，才不枉費宇宙完美安排。

還在「浮遊期」時桔建議過「不如去下啲寺廟」。所以其實皇上生病前，都有去到幾間⋯

其實主要人宅唔太想出街，所以通常都係有野做就出去去附近寺廟咁。真係有怪莫怪～

好一段時間無post出，因為皇上病咗。

時間都留咗畀皇上，朝早730到晚餐後，煮早餐煮下午煮晚餐，煲馬齒莧水，餵藥搽藥買餸，同家庭煮婦無兩樣。

晚上的me time用咗追唔需要用腦但好睇的韓劇，連書都沒看。因為累。有好幾日睡眠嚴重不足，覺得人像空盪盪的，全身肌肉都在微震。等到今個星期皇上病情稍緩，唔需要好貼身的侍候，先多咗啲休息時間，都可以偷三數小時去車程近嘅地方。

今日去完洗衣店（係，因為金水爺瀨咗尿係被），往食早午餐路上見到久別的羽毛。其實繞咗路行，純粹覺得「不如試下行呢度」。好多時我的人生都太安全，因為覺得安全先可以足以應付家的責任。好似講遠咗，不過呢段日子覺得整定咁，如果唔係空窗期就冇人有時間照顧皇上，同時開始番少少冥想時間，感覺到喉嚨到胃係塞實咗，連OM都發唔到音咁滯，連早前彩油reading 時老師提到，點解你呼吸去到胃就停咗？笑話竟然可以生存得到。

無空窗期，我諗都冇咁覺得出咗咩問題。而呢兩日終於感受到嗰種塞，條路就出現羽毛。金牛新月好似會有能量嘅起動，既想繼續休息又想有穩定收入嘅我，呢個月真係要認真番少少調整自己至得。

在芳華絕代開餐，吃完後放空呆坐個多小時，朋友在IG上得知我位置，沒說一句就趕來陪看醫師，拉著一起行街和飲春水堂。

還有問約陪食書僮的桔；

和在面書留言得知本人浮游的polemate，一看到留言就DM「過嚟陪我練pole」⋯

空窗期的生活漸漸變得少了灰色，好像試試享受休息的忙和休息的休息⋯

謝謝大家的貼心和窩心～

和兩個好耐冇見的polemate朋友練完pole，轉到荔枝角開餐，朋友想去的店等好耐，另一個建議去little break，說吃過不錯，打電話問店又說有位，雖然心裡面不太想，最後都來了。

這家店好幾年前光顧過，當時滿有期待，但價錢和食物質素不成對比，之後都沒有再來。第一次光顧的朋友有打算日後移民開cafe，對咖啡快速起泡和拉花快速化掉有點不滿，的確沖得不好才如此，坦言不會再有下次。我就對價錢$178的All Day Breakfast心生不滿，但沒有出聲（😒），想給多次機會，最後一邊吃一邊掛念 The Bound by Hollywood的出品。

幸好咸點pancake都算有驚喜，和三個女仔叫兩份餐，冇咁肉赤。沒辦法，待業嘛，要量入為出呀～

某日與某人外出，本來嗰日說過好想飲咖啡但去了食混醬多，這日某人知道文記原來係黃店，就話去食車仔麵。

因為第一次去又多嘢點有啲混亂，結果忘記點飲品。

（文記真係好好食⋯）

然後，某人忽然話「深水埗唔係有條文青街好多cafe？」結果又去了文青街飲咖啡。

有時候其實都迷惘，但呢啲細節位，一點一點的，又覺得窩心。還是不要想太多好了。

有桔的通知，先知《夏目友人帳》上劇場版。

趁周六又有下午場，和桔去朝見貓咪老師去。特典版的禮品，靚到唔捨得用啊！

風中勁草，我咁覺得啦。

今年沒機會見到動人的花，但細緻，柔軟的芒草，總是在回家路上給予我快樂。

願也給你愜意。

桔，生日快樂！